سودانيات_1
محاولة بالسوداني ....
الجوا القليب كتير و ليهوا زمن بينادي
يسأل متى الريدة تتم وكيف مع سطوة عنادي
زمن رحلتوا و هجّرت القليب الدافي
ودعتوا بالقسوة وقلت بكرة الأيام تواسي
نساني الكبر والصدود وقسوة الأيام إنوا كلنا في المحبة سواسي
نجن بيهوا ونحن ليهوا
ونقسى بيهوا وبرضوا نتصبر بيهوا
القليب سنين ساير لا ليهوا لا عليهوا
لف بلاد كتيرة
وشاف ناس غزيرة
وزار ألف جزيرة
سألوهو وين يا قليب وين ودرت سيدك؟
قال ست الناس هناك هجرتني
وبعد سكناي فيها بكل قسوة طردتني
و بجفاها بعد الوصل فجعتني
حايم سنين أدور يمكن بعد النسيان تنشدني
يمكن الأميرة تحن و لعرشي من تاني ترفعني
صحي جهلتني و للمجهول سلمتني
لكن حنينة بتسلم لي ودعتني
ودمعها فاض يوم وداعي مع انوا عصي
وشوقه مع الأيام زاد عمروا ما جف في عشقي ندي
خبروني عنهاوقالوافي ليلا تبكي وينك يا قلبي الشجي
عود لي يا ضي السنين وين انت عشان لو ما جاييني أنا أجي؟؟
ماصدقت هجراني ليك طوالي سافرت يا قليبي الشقي
عودلي وخليني أحيا معاك باقي عمري الفتي
*****************************
ما يغرك مظهري الصغير
ترا الجوا قليبي ليك كتير
مستنيك تنبشوا يا أمير
وأبقى في حبك آسيرة وتبقى ليا أسير
يا خوفي بعد إقبالك عني تدبر ومع الأيام تسير
ودمعي العصاني بعد هجرانك لي يسيل
و بعد فرحتي بيك من فرقاك للهموم أشيل
ربيني وربي قليبي في هواك يا نحيل
ضمني ليك خلينا نطرد بهوانا أسى الحزن النبيل
ياحليل أيام سؤالك وين أيام جودك يا بخيل
و لا كانت لعبة سليني في الهوا لحدي ما ألقى البديل
وخليكي معاي دام انت أحسنهم لحدي ما ألقى الأحسن يا جميل
يا ترالقيت الأحسن؟ما مشكلة بعرف كيف أداوي قليبي العليل
وإذا كنت فاكر إنوا عرفتني لا, يا من أنت للأجاويد سليل
جهلتني ياباسم الثغر لما بديت في حبك أتاتي
ولما بدا القليب زي الطفل بغنوة حبك يناغي
و بصورتك في عز الليل أسرح وليها أناجي
ليه ديمة في قصص الحب واحد مدبوح والتاني ناجي
الله لينا مع وهمة الحب البنعيشا
ومشكلتنا مع الأيام بنعيدا
يرويها أسى الحب القديم ويزيدا
نشكيها ونتألم و يحرقنا حر لهيبا
و للحديث بقية وتعديل 
No comments:
Post a Comment